:: Karólína Eiríksdóttir

Söngverk

Landið þitt er ekki til

fyrir mezzósópran, trompet og gítar
2011
myndbandsverk

Landið þitt er ekki til er myndband eftir Ólaf Ólafsson og Libiu Castro.
Verkið var frumflutt á gondola á síkjum Feneyja við opnun Feneyjatvíæringsins 2. júní 2011. Myndbandið var hluti af sýningu Ólafs og Libiu á Feneyjatvíæringnum 2011 sem stóð til 27. nóvember.

Flytjendur: Ásgerður Júníusdóttir, mezzósópran, David Boato, trompett og Alberto Mesirca, gítar.

[Leitaðu að "Landið þitt er ekki til" á Google]

The Caregivers

sópran, óbó og kvennakór

2008
14'
Tónlistarmyndband.

The Caregivers er samið að beiðni myndlistardúósins Libiu Castro og Ólafs Ólafssonar við texta eftir Davide Berretta. Verkið fjallar um úkraínskar konur sem annast aldraða á Ítalíu, en þær eru einhvers staðar á bilinu sexhundruð þúsund til ein milljón.

Frumsýning: Evróputvíæringurinn Manifesta 7, Trentino Aldo Adige á Ítalíu, 19. júlí - 2. nóvember 2008. Flytjendur: Ingibjörg Guðjónsdóttir, sópran, Matthías Nardeau, óbóleikari og Kvennakór Garðabæjar undir stjórn Ingibjargar Guðjónsdóttur.

[Leitaðu að "The Caregivers" á Google]

Stjórnarskrá Lýðveldisins Íslands

fyrir sópran, barítón, píanó, kontrabassa og blandaðan kór.
2008
40'

Verkefnið er samstarfsverkefni myndlistardúósins Libiu Castro og Ólafs Ólafsson og Karólínu Eiríksdóttur. Libia og Ólafur fóru þess á leit við Karólínu að hún semdi tónverk þar sem allar 81 greinar stjórnarskrárinnar væru sungnar.
Með verkinu halda Libia og Ólafur áfram að rannsaka og endurspegla persónuleg og samfélagsleg málefni, blanda þeim saman og vinna á mörkum hins raunverulega og hins skáldaða og með því að snúa lagalegum grunni samfélagsins, stjórnarskránni, yfir á huglægt form lista, gefa þau fólki kost á að meta þennan lagagrunn út frá sjónarhorni þar sem segja má að annarskonar þyngdarafl sé í gildi.

Frumflutningur: Laugardaginn 15. mars 2008, klukkan 14:00 í Ketilshúsinu í Listagilinu á Akureyri.
Flytjendur: Ingibjörg Guðjónsdóttir, sópran; Bergþór Pálsson, baritón; Tinna Þorsteinsdóttir, píanóleikari; Gunnlaugur Torfi Stefánsson, kontrabassaleikari og kammerkórinn Hymnódía undir stjórn Eyþórs Inga Jónssonar.

Flutningurinn er liður í myndlistarsýningunni Bæ-Bæ Ísland sem opnar klukkan 15:00 í Listasafninu á Akureyri, sýningarstjóri hennar er Hannes Sigurðsson.

[Leitaðu að "Stjórnarskrá Lýðveldisins Íslands" á Google]

Njóla

fyrir sópran og píanó
4'30''

Njóla (nótt) er fyrir sópran og píanó við texta eftir Björn Gunnlaugsson (1788-1876). Björn var stærðfræðingur og kennari við Bessastaðaskóla. Í Njólu lýsir Björn gerð alheimsins í bundnu máli. Verkið var samið til flutnings á samkomu í Hátíðasal Íþróttahúss Álftaness, 1. desember 2007, þar sem minnst var 200 ára afmælis Bessastaðaskóla, Bessastaðaskóli - vagga íslenskrar menningar.

Frumflutningur 1. desember 2007 í Íþróttahúsi Álftaness.
Ingibjörg Guðjónsdóttir, sópran, Tinna Þorsteinsdóttir, píanó.

Sólin er runnin upp - Sópran og Píanó

Samið í tilefni sjötugsafmælis Hannesar Péturssonar, frumflutt á hátíðasamkomu til heiðurs skáldinu á Álftanesi.
Flytjendur: Ingibjörg Guðjónsdóttir, sópran og Valgerður Andrésdóttir, píanó

Snæfellsjökull gengur á land

Mánuðurinn mars

Útgefið:
SMK 21 Minn heimur og þinn – Ásgerður Júníusdóttir, mezzosópran: Ásgerður Júníusdóttir, mezzosópran og Steinunn Birna Ragnarsdóttir, píanó

Heimkynni við sjó

Sönglagaflokkur fyrir sópran og píanó
1997
Ljóð eftir Hannes Pétursson
ca. 23'

Samið fyrir Ingibjörgu Guðjónsdóttur og Tinnu Þorsteinsdóttur, sem frumfluttu verkið á tónleikum í Listasafni Íslands 19. apríl 1998.

Lagaflokkurinn Heimkynni við sjó (1997) fær heiti sitt af samnefndri ljóðabók Hannesar Péturssonar, skálds. Bókin kom út 1980 og í henni er að finna sextíu ljóð sem öll tengjast með einum eða öðrum hætti heimahögum skáldsins á Álftanesi. Karólína, sem einmitt sjálf býr á þessum slóðum, hefur valið níu þessara ljóða í verk sitt og endurspegla þau öll tengsl mannsins við hið náttúrulega umhverfi sitt. Við sjáum náttúruna með augum skáldisins, sem hann ávarpar og persónugerir eins og jafningja sinn. Selirnir eru vinir hans, hann og tjaldurinn eru tveir steinar sem horfast í augu, og fiskasteinninn sem hann ber heim til sín þráir að komast í fjöruna á ný. Ólíkt mannvirkjunum hafa formin í náttúrunni tilgang af sjálfum sér: Keilir er engum reistur og í flæðarmálinu er steinninn minnisvarði um Ekkert. Yfir öllu hvílir hin svala ró sem jafnvel sauður af sögufrægum stofni fær ekki raskað.
Karólína fangar andblæ ljóðanna, ýmist með beinum myndlíkingum, uppbyggingu formsins eða með framvindu hinnar dramatísku frásagnar. Hlutur píanósins er oftar en ekki að teikna upp þær myndir sem birtast í ljóðunum á meðan frásögnin sjálf liggur frekar hjá söngröddinni. Upphafshljómarnir í Blár þríhyrningur teikna upp form pýramídans, kraftmikið áttundaspil í Fiskasteinn kallar fram "fjörur stórar og veður," og í Selirnir tákngera píanóepísóðurnar hólmana í sjónum útifyrir sem ýmist rísa úr sæ eða hverfa undir brimöldur. Söngröddin flytur orðin umbúðalaust, hendingaskipan fylgir uppbyggingu ljóðanna, og flúr og skraut er víðs fjarri. þetta er þó ekki einhlítt, t.d. í Fiðrildin þar sem söngröddin er í hlutverki fiðrildisins sem flögrar um stráum ofar en hljómar píanósins vekja minningu um kyrrð sumardagsins, og í ljóðinu Flatur steinn þar sem strax í upphafi söngröddin gefst steininum "sem úr greip manns flýgur." Í ljóðinu Tjaldurinn er myndlýsingin ekki eins augljós þar sem í bakgrunni má heyra tvær samhliða laglínur fjarlægjast hvora aðra með því að bilið á milli þeirra er aukið í hvert sinn sem píanóið endurtekur þær. Línurnar liðast þannig í sundur rétt eins og látínan í ljóði skáldsins.
Ingibjörg Guðjónsdóttir og Tinna þorsteinsdóttir frumfluttu þennan lagaflokk á tónleikunum með verkum Karólínu í Listasafni Íslands 19. apríl 1998, og er verkið skrifað fyrir þær.

Frumflutningur: 19. apríl 1998 í Listasafni Íslands, Ingibjörg Guðjónsdóttir, sópran, Tinna Þorsteinsdóttir, píanó

Útgefið:
smk 13 Karólína Eiríksdóttir - Spil: Ingibjörg Guðjónsdóttir, sópran og Tinna Þorsteinsdóttir, píanó

Sem dropi tindrandi

Sem dropi tindrandi við ljóð Hannesar Péturssonar var frumflutt við athöfn í Bessastaðahreppi, þegar frú Vigdísi Finnbogadóttur lét af störfum sem forseti Íslands og hreppsbúar héldu henni samsæti að því tilefni. Lagið er tileinkað henni.

Sjávarsteinn

Monologue

Sópran, fl., óbó, kl., fgt., hn., slv. og strengjasveit
1994 (1988)
ca. 9'
Texti eftir Marie Louise Ramnefalk

Monologue úr óperunni Någon har jag sett (Mann hef ég séð) fyrir sópran og kammerhljómsveit.

Óperan Mann hef ég séð er í þremur þáttum fyrir sópran, mezzósópran, tenór, barítón og kammer hljómsveit.

Óperan var pöntuð af Vadstena Akademien í Svíþjóð og frumflutt þar árið 1988. Árið 1989 var óperan flutt í Reykjavík á Hundadögum, síðan hefur óperan verið flutt í London og Greifswald í Þýskalandi.

Útgefið:
ITM 7-01 Karólína Eiríksdóttir - Portrait:
2. þáttur
Ingegerd Nilsson, sópran, Dies Caniculares Festival Orchestra, stj. Per Borin

Frábæra, bæra

Gamalt íslenskt sálmalag
útsett fyrir sópran, viola da gamba og sembal
1994
Sálmur eftir Jón Píslarvott

Na Carenza

Na Carenza var samið að tilstuðlan austurríska tónlistarfræðingsins Regina Himmelbauer. Hugmyndin var að fá kventónskáld víðsvegar úr heiminum til að semja verk við kvæði kvenkyns trúbadúra, en trúbadúramenningin blómstraði í Suður Frakklandi og víðar í Suður Evrópu á miðöldum. Talsvert af kvæðum kventrúbadúranna hafa varðveist, en engin laga þeirra. Na Carenza var frumflutt á alþjóðlegri tónlistarhátíð kvenna í Vínarborg árið 1995 en frumflutningur á Íslandi fór fram í Skálholti sumarið 2001.

Ljóðnámuland

Sönglagaflokkur fyrir barítón og píanó
1987
ca. 15'30''
Texti eftir Sigurð Pálsson

Ljóðnámuland var samið árið 1987 sem hluti af samstarfsverkefni Norrænu Tónlistarháskólanna og NOMUS, þar sem pöntuð voru tíu verk frá Norðurlöndunum, tvö frá hverju landi, fyrir söngrödd og eitt hljóðfæri. Tónskáldin tíu ásamt tíu söngvurum og tíu hljóðfæraleikurum hittust síðan í Gautaborg haustið 1987 þar sem verkin voru æfð og flutt. Ljóðnmuland heyrðist í fyrsta skipti á Íslandi á Myrkum Músíkdögum 1989.
Samið fyrir Kristin Sigmundsson og Guðríði St. Sigurðardóttur.
1987.

Frumflutningur: Nóvember 1987, Gautaborg; Kristinn Sigmundsson, Guðríður St. Sigurðardóttir

Útgefið:
ITM 7-01 Karólína Eiríksdóttir - Portrait: Kristinn Sigmundsson, barítón, Guðríður St. Sigurðardóttir, píanó.

Sumir dagar

Sópran og kammerhópur (fl., kl., vlc. & pno.) eða (fl., kl.,vlc., semb. & gít.)
1983
12'30''
Texti Þorsteinn frá Hamri
6 ljóð: Gunnarshólmi, Eign, Sannleikurinn, Í hrapinu, Kvöld, Sumir dagar

SUMIR DAGAR voru samdir árið 1982 og var hljóðfæraskipan þá sópran, flauta, klarinett, selló og píanó. Vorið 1991 voru SUMIR DAGAR umskrifaðir fyrir Sumartónleika í Skálholti og komu þá semball og gítar í stað píanós áður. Verkið er skrifað við sex ljóð eftir Þorstein frá Hamri; Gunnarshólmi, Eign, Sannleikurinn, Í hrapinu, Kvöld og Sumir dagar.

Frumflutningur: 21. feb. 1982, Musica Nova, Norræna Húsið; Signý Sæmundsdóttir, Bernard Wilkinson, Einar Jóhannesson, Gunnar Kvaran, Guðríður St. Sigurðardóttir

Frumflutningur 2. útgáfu: 13. júlí 1991 á Sumartónleikum í Skálholti; Signý Sæmundsdóttir, Kolbeinn Bjarnason, Einar Jóhannesson, Helga Ingólfsdóttir, Einar Kristján Einarsson og Sigurður Halldórsson.

Japönsk ljóð

Sex japönsk ljóð voru samin árið 1977 og frumflutt í Ann Arbor í Michigan.
Í japanskri ljóðlist eru dregnar fram stuttar svipmyndir í sem fæstum orðum. Sex japönsk ljóð bera keim af þessu ljóðformi, og er útkoman þess vegna sex "míníatúr" tónverk.