:: Karólína Eiríksdóttir :: Einleiksverk ::

Einleiksverk

Eintal

fyrir einleiksfiðlu
2008
6'

Eintal er skrifað fyrir Guðnýju Guðmundsdóttur, konsertmeistara í tilefni 60 ára afmælis hennar. Verkið er í einum kafla.

Frumflutningur: TÍMAMÓT - GUÐNÝ GUÐMUNDSDÓTTIR KONSERTMEISTARI 60 ÁRA
Salurinn, 27. mars 2008 kl. 20

[Leitaðu að "Eintal" á Google]

Sónata

fyrir gítar
2005

Sónata er skrifuð fyrir Ögmund Þór Jóhannesson, sem frumflutti verkið 8. júlí 2006 á Festival de Musique, Provence –Islande. Sónata er í fjórum köflum: Tokkata, Fúga, Air og Ballada.

[Leitaðu að "Sónata" á Google]

Partíta

2005
12'

Partíta fyrir píanó er samin fyrir Tinnu Þorsteinsdóttur og tileinkað henni. Tinna frumflutti verkið á Listhátíð í Reykjavík í maí 2007 á tvennum einleikstónleikum; í Ými í Reykjavík og í Laugaborg í Eyjafirði.
Partítan er í fimm köflum.

Frumflutningur 22. maí, 2007, Listahátíð í Reykjavík í Laugaborg; Tinna Þorsteinsdóttir píanóleikari

[Leitaðu að "Partíta" á Google]

Innan hringsins

fyrir gítar
2004

Innan hringsins er skrifað fyrir argentínska gítarleikarann Sergio Puccini, sem mun frumflytja verkið á Myrkum Músíkdögum, 11. febrúar 2006. Verkið er í þremur köflum.

Frumflutningur: Myrkir Músíkdagar í Norræna húsinu, 11. febrúar 2006; Sergio Puccini, gítar

Gradus ad Profundum - Kontrabassi

Spor - Altflauta

Spor fyrir altflautu er skrifað fyrir Guðrúnu S. Birgisdóttur, sem frumflutti verkið í Listasafni Sigurjóns Ólafssonar í nóvember 2000.
Verkið er í þremur þáttum. 1. þátturinn byggist á örstuttum laglínubrotum, sem eru síbreytileg og í síbreytilegum ryþmum. Ef til vill eru þetta sporin eftir þrestina í snjónum. 2. þátturinn byggist á löngum syngjandi laglínum, sem staldra við annað slagið. 3. þátturinn er stutt scherzo.

Frumflutningur: Listasafn Sigurjóns Ólafssonar, 19. nóvember 2000, Guðrún S. Birgisdóttir, flauta

Flautuspil - Flauta

Flautuspil (1998) er í einum samfelldum kafla þar sem skiptast á tvær ólíkar hugmyndir. Fyrst eru hvikul skalabrot og endurteknar nótur sem snúast í kringum ákveðnar tónmiðjur er færast til eftir því sem líður á. Hins vegar hægari línur sem kallast á eins og í ljóðrænum söng. Formið minnir á sónötuformið þar sem framvindan er hröðust í úrvinnslunni um miðbikið. Ítrekunin í lokin brýtur á hefðinni. Í stað skalabrotanna úr byrjun verksins hljóma ljóðrænu línurnar, en nú fléttaðar með enn fjölbreyttari hætti en áður. Karólína samdi Flautuspil fyrir Martial Nardeau, sem frumflutti það á tónleikum í Listasafni Íslands þann 19. apríl 1998, en á þeim tónleikum heyrðust öll þau verk sem eru á þessum hljómdiski.

Frumflutningur: 19. apríl 1998 í Listasafni Íslands, Martial Nardeau, flauta

Hugleiðing - Fiðla

Hugleiðing fyrir einleiksfiðlu var skrifuð árið 1996 fyrir Hlíf Sigurjónsdóttur sem frumflutti verkið í Listasafni Sigurjóns Ólafssonar í júní 1997. Verkið er í einum kafla og er byggt á hugmyndum sem þróast áfram og birtast í ýmsum myndum, eins konar tilbrigði án stefs.

Frumflutningur: 24. júní 1997, Hlíf Sigurjónsdóttir í Listasafni Sigurjóns Ólafssonar

Skýin - Selló

Karólína samdi Skýin (1995) fyrir Gunnar Kvaran sellóleikara sem frumflutti verkið á Sumartónleikum í Skálholti 1997.

Kaflarnir eru þrír. Sá fyrsti hefst á löngum söng á efra sviði hljóðfærisins og dragast línurnar allar að sömu miðjunni, tvístrikuðu Aís. Neðra sviðið opnast með hægum stígandi strófum og í síðustu hendingunum er opna fimmundin á tveimur neðstu strengjunum allsráðandi.

Inngangur annars kaflans minnir á sálmkóral. Hægferðug laglína í efra sviði brýtur hann upp og heyrist sú lína aftur í lok kaflans. Miðhlutinn er leikur að blæbrigðum: yfirtónalínur kallast á við andstæður, brotna hljóma, þar sem opna fimmundin úr fyrsta kaflanum skýtur aftur upp kollinum. Form kaflans minnir á rondó.

þriðji kaflinn er fjörlegur og hraður. Kunnuglegar hugmyndir úr fyrri köflunum setja mark sitt á tónlistina en í forgrunninum heyrast óreglulegar fléttur með endurteknum nótum. Andi scherzosins svífur yfir.

Frumflutningur: Sumartónleikar í Skálholti, 2. ágúst 1997, Gunnar Kvaran, selló

Vorvísa - Semball

Vorvísa var samin fyrir Helgu Ingólfsdóttur. Verkið er í einum kafla þar sem skiptast á frjálsir kaflar og kaflar sem hlíta eigin lögmálum.

Útgefið:
SMC 7
Frá Strönd til fjarlægra stranda
Helga Ingólfsdóttir, semball

Hvaðan kemur lognið - Gítar

Hvaðan kemur lognið? var samið fyrir Einar Kristján Einarsson til flutnings á Sumartónleikum í Skálholti sumarið 1990. Verkið er í fjórum nafnlausum köflum sem hver um sig byggir á eigin efni og sérkennum.

Í öllum köflunum fjórum vinnur Karólína með andstæður sem stillt er upp hlið við hlið: einradda línur gagnvart þykkari hljómum og jafnvægi gagnvart ókyrrð. Engu að síður er vefurinn breytilegur innan hvers kafla: í þeim fyrsta þykknar hann þegar nálgast lokin, í þeim næsta þynnist hann mjög og verður nánast að engu áður en þræðirnir fléttast saman aftur á ný, en í seinni tveimur köflunum fjölgar Karólína þráðunum eftir því sem á líður og með því birtast litbrigðin, ný og ný.

Hjálmar H. Ragnarsson

Frumflutningur: 11. ágúst 1990, Sumartónleikar í Skálholti 1990; Einar Kristján Einarsson

Útgefið:
smk 13 Karólína Eiríksdóttir - Spil: Einar Kristján Einarsson, gítar
EKE001: Einar Kristján Einarsson, gítar

Hringhenda - Klarinett

Hringhenda var samin árið 1989 fyrir Einar Jóhannesson og frumflutti hann verkið sama ár í Svíþjóð. Hringhenda heyrðist í fyrsta skipti á Íslandi á Sumartónleikum í Skálholti árið 1991. Hringhenda er í fjórum köflum og bera þeir heitin Prelúdía, Rondó I, Intermezzo og Rondó II. Rondó I og II eru viðamestu kaflarnir og eru eins og nöfnin benda til í eins konar frjálsu rondóformi. Hinir tveir kaflarnir eru örstuttar hugleiðingar í frjálsu formi.

Rhapsodia - Píanó

Rhapsódía var samin árið 1986 og frumflutt af Guðríði St. Sigurðardóttur á Skerpluhátíð Musica Nova 1987.

Frumflutningur: 28. maí 1987, Musica Nova í Norræna Húsinu; Guðríður St. Sigurðardóttir

Útgefið:
ITM 7-01 Karólína Eiríksdóttir - Portrait: Guðríður St. Sigurðardóttir, píanó

Ferðalag fyrir fingur - Píanó

Ferðalag fyrir fingur er skrifað 1986 fyrir Tinnu Þorsteinsdóttur, sem frumflutti verkið á tónleikum Tónmenntaskóla Reykjavíkur í Austurbæjarbíói. Verkið er ætlað fyrir nemendur á ca. 5. stigi í píanóleik.

Frumflutningur: 3. maí 1986; Tónmenntaskóli Rvíkur í Austurbæjarbíói; Tinna Þorsteinsdóttir

Eins konar Rondó - Píanó

Eins konar rondó var skrifað sumarið 1984 og frumflutt á Alþjóðlegri tónlistarhátíð kvenna í París sama ár. Verkið var samið fyrir Eddu Erlendsdóttur.

Útgefið:
Classico CLASSCD 165 - Dance of the Bacchae: piano music from the Nordic countries - Elisabeth Klein, píanó

In Vultu Solis - Fiðla

In Vultu Solis var samið sumarið 1980 fyrir Guðnýju Guðmundsdóttur og frumflutti hún verkið skömmu síðar. Verkið er gert úr afmörkuðum frumum sem birtast margsinnis, annað hvort nær óbreytt eða svo mjög umbreytt að þau verða nánast óþekkjanleg. Við hverja endurkomu missa þau einhverja eigind sína en bæta í staðinn annarri nýrri við sig.
Form verksins er frjálst, það byggir hvorki á stefjaúrvinnslu né endurtekningu. Segja má að um sífellda þróun sé að ræða, hver hugmynd leiðir af annarri.

Frumflutningur: 15. júní 1981, Músíkhópurinn að Kjarvalsstöðum; Guðný Guðmundsdóttir

Útgefið:
ITM 5-02 Violin Music from Iceland, Guðný Guðmundsdóttir
ITM 7-01 Karólína Eiríksdóttir - Portrait: Guðný Guðmundsdóttir, fiðla